« اوقات فراغ | HomePage | اني راحلة »
06/24/2006
الريس برج الثور
لمّا بتعرف علي حد, لازم اسأل :"هو انت برجك ايه؟" وكل مرة تطلع مظبوطة…الابراج بتوصف خبايا الشخصية… بصورة صحيحة و بنسبة كبيرة….بحب اللعبة دي اوي,,و يا سلام لما تكون علي اشخاص اناّ كوّنت رأيي عنهم, و فهماهم, و بعدين اكمل الصورة بمواصفات البرج…يا سلااااااام…ابقي جبت جون!
انا مثلا من مواليد برج الجدي, المتسم بالواقعية, الجدية, التشاؤم, محب للعمل, خوفه من المرض, ولاءه للأصدقاء, بارد, كتوم لعواطفه و احاسيسه....اهي دي خطوط عريضة لشخصيتي
انا بقة دايما كان يؤرقني سؤال " هو مبارك برجه ايه؟؟؟" و بما ان كلنا عارفين العيد الملكي بتاع يوم ميلاد الريس, و صوره هو و العيلة المباركة في هذا اليوم المقدس, و يا سلام ع الصورة بتاعته بالترينيج (اه والله تريننينج) في الجونينة مع ماما سوزي…صورة خرااااافة , حب بقة نقول ايه…..المهم, الموضوع مش محتاج تحري ان سيادة الرئيس برج الثور….مش صفة…بلاش
قلة ادب
هم يحبون الذهاب للتشمس بشكل مفرط
مش بقولك جونينة و سوزي و تريننيج-من عنواين الاخبار: سافر الرئيس محمد حسني مبارك الي شرم الشيخ لعقد مؤتمر الشماسي- اقصد مؤتمر القمة العربية
الرئيس يشرب الشاي مع مواطن مصري في الطل كدة
مخلص جداً للأصدقاء والعائلة، يفضل الثور الصداقات طويلة الأمد
صفوت الشريف, الشازلي. فاروق حسني, سرور, والي, 25 سنة كفاح ونضال من ايام ما كان لسة بشورت
اقتصادي ويعرف كيف يصل إلي مركز مادي مرموق , المال لا يغير فيه شيئا بل يزيده التصاقا بالناس وخاصة أصدقاء الطفولة
مش بقولك ايام ما كان بيلعب معاهم بشورت...عِشرة يابااااا...يعني اتنغنغوا معاه...اصدقاء طفولة بقة
يرتاح للتقاليد ويرغب في عدم تغيير عاداته، ينظر إلى ما هو جديد ومتطور بقدر اقتناعه به ويوظف ما يعجبه منه لصالحه
بعد 25 سنة خدمة في البلد دي و تقولولي كفاية.........طبعا الي جانب المذكور اعلاهم...نلاقي الجديد متمثل في جمال مبارك, احمد عز, محمد كمال, شوية روشنة يعني...عشان منزهقش..فكر جديد..جمعية جيل المستقبل..ااااااااه يا بلد
الحياة سهلة معه، مرح جدا خاصة عندما يكون سعيدا وأمامه طاولة عامرة ورفقاء يرتاح إليهم
والله الراجل معاه الحرس القديم كله مبيغيرش, يعني حاسس بالراحة و لذلك داخل ع الفترة السابعة, بس انت قول يا رب
علاقة الثور مع المال علاقة وثيقة , محظوظ في المال
الرئيس حسني مبارك اغني من حكم مصر- عنوان جريدة الدستور هذا الاسبوع...هل تعرف سيادتك مرتب رئيس سيادتك برده؟ طيب احسن عشان صحتك..عشان الارقام ام اصفار كتيرة بتجيب كرشة نفس لامثالك
برج الثور والحظ والمال:- لا شيء يصعب على مواليد هذا البرج، فالنجاح يسعى إليهم، صبور يعتمد على نفسه، يهوى التجارة، وكثيرا ما يكون ناجحا في هذا المضمار يطمح دائما إلى النجاح ويحلم ببناء إمبراطورية خاصة به
انا عارفة الامبراطورية دي: عزبة مبارك و عائلته
قليلا ما يتعرض إلي المرض , وفي حالة مرضه فشفائه بسرعة صعب لأنه لا يملك روح التفاول
أكثر الإمراض التي يتعرض لها ما يتعلق بالعامود الفقري والعنق وقد تسبب له السمنة أحيانا إمراض القلب
الله اكبر الله اكبر..78 و الريس تمام.....اللهم لا حسد...امسك ترابيزة الكمبيوتر ...والله الراجل بتاع الابراج هو اللي قال موضوع العمود الفقري مش انا..ده كان خلاص حيكتب و يعالج مرضي برج الثور بألمانيا...طيب فاكرين الريس لمّا كان في المستشفي بألمانيا و اجري حوار هاتفي مع التلفزيون المصري...بزمتك ساعتها الريس ما كنش وحشك...و الدمعة حتفر من عينك؟؟؟ انكر بقة
ضخامة , حضور , ضحكة جذابة وكلام قليل وأعصاب هادئة
يا سلااااااااام عليه وهو في اي حوار اجنبي ولا قومي حتي.. و قاعد بثقة....وهااااااااادي...والقارئ يولع مش القضية....لا بجد يا عيني عليه وهو بيعمل الحوار مع المراسل الاسرائيلي في ذكري الضربة الجوية- جتوا ضربة في قلبه المراسل مش الريس- يلا ربنا يخليلنا روزاليوسف
بحاجة إلي وقت طويل للراحة بعد عناء العمل
وإذا لم يجد الراحة يتحول إلي عصبي وقلق ولا يعرف ما يريد
عدم التسرع في اتخاذ القرارات يكسبه شخصية مميزة وفريدة من نوعها
فترة سادسة ولسة بنقول يا ديموقراطية و يا اصلاح و يا شفافية....وانا و انت
يعمل باستمرار من أجل المستقبل لا يقوم بأي مخاطرة بإمكانها وضع عائلته أو ميزانيته في خطر، يبحث عن الاستقرار والطمأنينة في إطار الأمان العائلي والمادي
و اعظم سلام و تحية للفكر الجديد, و جمعية جيل المستقبل...و البيزنيس, و التوريث, و علاء في الاقتصاد, وجمال في السياسة, و ماما سوزي في كل الانشطة الاجتماعية...و مفيش اي خطر علي جمال باشا..كله في اطار الامن و الامان حجم عائلي- كومبو يعني
يتمتع بإدراك قوي وبعد نظر، صاحب حيلة ودهاء، عملي يتجه نحو نتائج مضمونة وواضحة
معني هذا ان السحل و الاعتقال, و الضرب و التلطيش انما يعكس بعد نظر لفخامته
و النتائج معروفة....انتو اللي مش فاهمين الراجل ده يا ظلمة
زوج كريم شريف يعامل زوجته معاملة حسنة، لا يتذمر إذا اشترت أغلى الملابس وأغلى العطور، يحترم زوجته كثيرا لكن عليها ألا تغضبه لانه سيتحول إلى رجل صلب وعنيد
صحيح...عشان يخلص من طلباتها, النهاردة تفتح مكتبة, بكرة مهرجان. بعده ندوة..طلبات طلبات..لكن لو علي قد الهدمتين و ازازة كالونيا (انت بتحطي كالونيا؟؟؟كالونيا؟؟؟ بتتكاليني لمين؟).و ماله...و الحق يقال ماما سوزي و لا باين عليها سن...رشاقة,,و حلاوة,, شفتها بالبانتاكور مع الملكة رانيا؟؟! يلا خلّي الشعب يعيش وياكل قراقيش
غيور، محب للتملك، كثير الرفض للأمور، غير مرن، منطوي على الذات، طماع وجشع
من حكم في ماله ما ظلم...و الريس بيغير علي الشعب...لان المواطن المصري في القلب....يا ابن الشعب!
طماع؟؟ عييييييييييييب! دول شوية فكّة....خلّي جيمي يكبر استثماراته..و بعدين هذا يساهم في انتعاش بنوك سويسرا
غير مرن؟؟ يعني لمّا تقوله "كفاية"...الريس يوافق علي طول كدة و لا ايه؟ لمّا تفكرعظامته بوعود عدم حبس الصحفيين..و تعد تزنّ تزنّ....سيب الريس يسوي الطبخة بمعرفته...بعد نظر بقولك.. يا قصير النظر انت!
منطوي ع الذات............ااااه يا عيني متحوصل متتقوقع مش عارف يندمج مع الشعب ابن اللذين ده..امشوا بقة و سيبوا سعادته يرتاح
يفضلون التمتع بأشياء بعيداً عن الجماعة وبمفردهم
منطوي بقة نقول ايه...شايفين عمايلكم في فخامته؟ بيتمتع لوحده في الدور العلوي بالكافيار و ريش النعام.. بينما يسحل الصحفي... و يجوع العجوز...و تبكي الام الثكلي....و هو يتمتع بمفرده في التكييف في شرم الشيخ..بينا تغرق العبارة....و يحرق المسرح و القطار...و تسقط الطائرة
إذا رأيته متحمسا لا تتفاءل لأنه قد يخمد حماسه بأسرع مما تتوقع , أما إذا كان بطيئا ومترددا لا تنفعل لأنه قد يعطيك وعدا والوعد عنده مقدسا
يعني لو الريس انفعل و قال في الحملة الانتخابية لا لحبس الصحفيين..دي نزوة و حتعدي.. تطبيقا لمقولة "كلام الليل مدهون بالزبدة"...اما ان يقول في بدايه عهده الرئاسي..ارجع فلاش باك كدة 25 سنة ورا.. ووعد الريس بالديموقراطية....فتأكد انه وعد مقدس..سينفذ بعون الله....يستحضرني الان مشهد المأذون في مسرحية "الواد سيد الشغال" و هو يقول لزوجة عادل الامام- و يقلده عادل الامام
( تتنيسييييييييي و لا تتسنعييييييييييي)- تريثيييييييييييييي و لا تتسرعي
محب للموسيقي ويرتاح للموسيقي الحلوة , يقدر اللحن المبتكر والكلمات الغير مألوفة
وعلشان كدة احنا اخترناااااااك....و يخبط الريس بيده علي رجله مع الايقاااع... و يستمع لمحمد ثروت ..و العزبي...نادية مصطفي..و صفاء ابو السعود...و "اول ضربة جوية فتحت باب الحرية"....اديها كمااان حرييييييييييييية!
الثور والد حنون لا يزجر أبنائه ولا يلومهم علي تقاعس معين بل يساعدهم قدر الإمكان
بصراحة..الريس عمره ما قصر...طلعلنا شباب زي الورد...علاء طويل ووسيم...و جيمي, ااه من جيمي, مال و جمال. حسب و نسب.. و امين سياسات الحزب الوطني مرة واحدة...يا ريس : والله ما قصرت –علي رأي الاشقاء العرب
إذا قال قصد , وإذا وعد نفذ , وإذا نفذ اسعد
اااااااااااااااااااه من "اذا " دي...دعني اكمل الجملة
اذا وعد بترك الحكم.....و نفذ......فقد اسعد 72 مليون مصري!
لكن فعل الشرط مصحوب بأداة شرط
ممكن حد يدلني علي برج جيمي؟؟!
12:55 Posted in brain storm | Permalink | Comments (44) | Trackbacks (0) | Email this
Trackbacks
The URL to Trackback this post is: http://epitaph-87.blogspirit.com/trackback/868422
Comments
الاول مساء الفل ياقمر وأسفه اتاخرت فى الرد عليكى لانى ماشفتش رسالتك الا الان.....
ثانيا بقى بوست جاااااااااااااامد طحن ، فكرة عبقريه سواء فيما يتعلق بإختيار الفقرات او التعليق عليها وشرحها عملى، انتى بجد فى الوست ده كسرتى حواجز كتيرررررر ، تحررت لغتك وأفكارك ودمك زى العسل، كاتبه بطريقة مختلفة جداااا، وعجبتنى ونفسى كل الناس تقرأ البوست ده...
ثالثا ياقمر اغتقد بعد اللى انتتى كتبتيه كل واحد حيخلى باله من برجه ويغيره طبعا من باب التضليل...... تحياتى وربنا يوفقك ياقمر
Posted by: ba3dakalpalee | 06/24/2006
:-))))))
لا لا لا ...انا ماقدرش على كده..ايه خفة الدم دى..لا بجد بسم الله ماشاء الله عليكى ... البوست جامد جدا .و الفكرة جديدة و حكاية الابراج دى بينها بجد فعلا...انا عندى واحد صاحبى زيك كده بالظبط و بيعشق موضوع الابراج و بياخدها تحدى انه يكشف برج الشخص قبل ما يقو له عليه
من خلال تعاملاته معاه بس
بس انت شلفطتى الراجل خالص ...و الراجل برضه في عشرة بينا و بينه و العشرة ماتهونش
:))
و اقترح حفاظا على مشاعر باقى مواليد برج الثور نعمل برج للريس لوحده و نسميه البرج المبارك.... ايه يعنى اقل منها..ده اقل واجب..و الابراج تتشرف بأسمه.. و تبقى هدية نقدمها له بمناسبة عيد ميلاده اللى فات او اللى جى..بمناسبة تجديده لفترة فاتت او جاية..اى مناسبة..المهم ان احنا نعبر له عن امتناننا العميق لسيادته و لسنين عمره اللى فناها فى سرقة ال....اسف فى خدمة البلد
Posted by: hesham | 06/25/2006
بعدك علي بالي
حبيبتي و لا يهمك...و مبسوطة انك طليتي ع البلوج :)
ده تغيير بس عشان متقولوش عليّا كئيبة :))))
انت برج ايه بقه؟؟؟؟ عشان اعملك بوست لوحدك...:) ااصل انا بنادي بالمساواة بين الجميع
ولااااااااااااازم يبقالك بوست لوحدك...فيه اعز منك
هشام باشا
ايوالله عليك))))
انا ضحكت ع التعليق بتاعك اكتر من البوست بتاعي هاهاهاااااهاا
و ماله البرج المبارك
و يبقي رقم 13
عشان نحس
مهو مفيش ارقام تانية
يؤسفني يا هشام ابلغك..اني معرفش حاجة عن البرج بتاعك....))))
بس حقرالك..ولا تزعل نفسك))))))
Posted by: epitaph | 06/25/2006
اييه الحلاوة دي !! - ده انتي كنتي بتسخني لما سألتيني عن برجيي :)
بس الصراحة، دراسة مستفيضة - دي دبلومة مش كده؟
:D
Posted by: geddo iskandar | 06/25/2006
انا عمرى ما قلت انك كئيبة .. ( تفتكرى حد عاقل يتهمك باى حاجه يبقى مجنون ، تنشية شوية تحليل فى برجه يروح فطيس) وعموما لكل مقام مقال، وكل الطرق تؤدى الى روما وتوصل لما بداخلك ... واللى انا متاكده انه رائع وبرىء و فى نضارة وطزاجه وجمال .... ربنا يخفظك ويحميكى من البشر والناس ومن نفسك كمان ....
انا حاسه انك برج الجوزاء... مش عارفه ليه... انا طبعا مش زيك بفهم قوى فيها بس اهو شويه فضول، بس وبصدق اعترف لك انى احيانا كنت بقرأ فيها علشان احاول افهم من لبخطوط العريضه بعض البشر،،، بس يبدو انى غبية جدااااااااا، عموما تعالى نلعب لعبة الابراج انا وانتى وطبعا اللى يحب يشارك ...
بحبك وفرحانه بيك جدا وسعيدة بالتواصل معاكى ياقمر
Posted by: ba3dakalpalee | 06/25/2006
هشام أو أتش ....
انا فعلا ضحكت جدااااااااااااا لما قريت تعليقك وبالذات اقتراحك .. انت كمان دمك زى العسل
Posted by: ba3dakalpalee | 06/25/2006
Geddo eskandar
It is just 19 years alive under his reign...omal ely 3asroh mn zaman 7ayktebo eh bas..hehehehe!
بعدك علي بالي
انا معرفش اقول كلام حلو زيك كدة, بس بجد اشكرك, حبيبتي
انا حاسة ان فيه تواصل ما بينا في كلامك و طريقتك, يعني "كل الطرق تؤدي الي روما"دي جملتي هاهاهاهاها
استني هنا بقي...انا برج الجوزاء؟؟؟؟؟؟؟ ده انا اعتبره اتهام ليا
انا معرفش انا بيني و بين برج الجوزاء ايه...كل ما اسأل حد انت برج ايه ..يطلع الجوزاء..بدءا من صحبتي الانتيخ الي الخياطة والله)))
انا يا ستي برج الجدي 4-1- 1987
هو فعلا برج كئيب بس بموووووت فيه
ويلا لعب نلعب لعبة الابراج
Posted by: epitaph | 06/25/2006
انا اسفه مقصدش اتهمك وعارفه انك الجدى ما انتى قلتى كده فى الاول بس مش عارفه ليه حاسه انك الجوزاء... وعموما انا ممكن اقولك انا برج ايه بس عاوزة اعرف حتقدرى تتوصلى لبرجى ولا لا، رغم اننا ما اتكلمناش ... وبعدين افهم من كلامك انك بتكرهى الجوزاء؟؟؟؟
تعرفى انا اكبر منك بقد ايه ...... يالهوىىىىىىىىىىىىىىى
خايقة اقولك بعدين ما تقطعى تواصلك معايا ( اهىء اهىء) بس برضه غلاسه حاكلمك
Posted by: ba3dakalpalee | 06/25/2006
يا حبيبتي متعتزريش...انا من كتر ما اتعرفت علي جوزائيين بقيت منهم اهئ اهئ
بس بحبهم
شوفي يا ستي...انت قوس والله اعلم
وبعدين يا قمر تكلميني علي طول
هوا انا اطول
Posted by: epitaph | 06/25/2006
لا ياجميل نشنتى غلط ... بس قوليلى ليه قوس؟؟؟ مع انى للاسف جوزاء بس اوعى تزعلى نفسك ولا تتصدمى ولا تقطعى علاقتك بى ...معلش ضيفينى على القايمة
Posted by: ba3dakalpalee | 06/26/2006
صدام حسين من مواليد يرج الثور
Posted by: maksofa | 06/26/2006
ba3dek 3ala bali,
صدقتيني ان كل اللي اعرفهم برج الجوزاء.......وكلهم القريبين جدا لية
وانت كمان يا حبيبتي...اما موضوع ليه قوس دة الموضوع اللي جاي ان شاء الله
مكسوفة
نقطة مهمة جدا ...انا ما كنتش اعرف ان صدام برج الثور
اللعب بقة علي كبير قوي دلوقتي
Posted by: epitaph | 06/26/2006
بوست جااااااااااااااااااامد جدا جدا جدا
نتمنى المزيد
Posted by: صاحب البوابة | 06/26/2006
صاحب البوابة
شكرااااااااااااااااا يا باشا
وان شاء الله فيه جديد
يا شباب صحيح.....هل تعرفوا ان هتلر من مواليد برج الثور؟ هذا للعلم ليس الا!
Posted by: epitaph | 06/26/2006
l fekra say3a gedan gedan gedan .... begad awel mafta7t w la2eit abrag matwk3etsh en momken tiggi el fekra f dema3' 7ad ... w wade7 en kol mawalid borg l thor fihom 7'at keda wa7ed .... ;)
mesh 3arfa a2olek 3'ir enaha 3alla l ra3'm men wahm l abrag f ba3d l aw2at ... bas enek lama teshofi 7ad w tatwaka3i borgoh betsahel 7etaa men l sekka ... aw 3alla l a2al te7esi enek te3rafih ....
bahanikiiiii be shedaaa
Posted by: ens-san | 06/26/2006
ممكن تصحيح بسيط بس لو تسمحوا يا جماعة
انا راى ان مبارك مش برج الثور
مبارك هو ثور البرج
متهايألى كدة اشيك واصح
واللة اعلم
Posted by: adhm | 06/27/2006
LOOOOOL
el post de maskhara....gamda mooooot.
bas ya haram keda fe3lan mawaleed borg el tor mazlomeen, ya3ny fe nas kowayesa toor.
lol, i like the whole guessing game....i play it often.
Posted by: Maat | 06/27/2006
epitaph
mish la2i 3'ir bravooooo momkin a2olha
mawdoo3 wahmiiiiiiiiiiiii wi 3inab wi looz wi bas 7'alas
adhm .. gamda toor l borg di lol
Posted by: mitar2a3 | 06/27/2006
ensan,
lool...keways eno 3agbeka...dawmy 3al ziara))
adhm,
اقتراح جااااااااااامد...حلوة ثور البرج دي
الموافق علي طلب النائب ادهم يتفضل برفع يده
موافقة
:)
Maat,
ahlan ya amr, lol..the games works dear, as you see! Lol
Mitar2a3,
thanks ya basha,, and merci for el comment..
hey fein el URL = Blog beta3ak?! :)
shukran shabab)))
Posted by: epitaph | 06/27/2006
ابيتاف
الابراج دي هاتلحس دماغك ، ده انتي مدمنة بأه بس بعد البوست ده وتفسيراتك ابتديت اقتنع بالابراج ، بس مش عارف ليه باحب الابراج الصينيى باحس انه كتير اكتر من اتناشر بس مش عارف كده الواحد يكون له اكتر من برج ولا إيه؟
Posted by: Ahmed Shokeir | 06/29/2006
شوف الافترا ؟؟؟ مين قالك الريس مبارك برج التور .. يا راجل بلاش هلضمه .. الريس مبارك هو التور ذاته
Posted by: نفر | 07/25/2006
هوا فيه انجذاب جامد جدا بين الجدى والجوزاء
انا الجوزاء واكتر ناس بيعجبونى الجدى
رغم ان فيه تناقض كبير اوى بين صفات البرجين
الجدى عاقل و رزين و عارف هوا بيعمل ايه
والجوزاء مجنون ابن مجنونه وكل 3 ثوانى بحاله ومبيعرفشى يثبت ف مكان واحد
Posted by: elham | 09/15/2006
مادا عن حب ل احمد مهدا عن حياتي
Posted by: ابتسام | 11/18/2006
ماذا عن برج الثور والارتباط " الزواج
برج الثور المرأة
Posted by: noor | 12/05/2006
بوست جميل جدااااااا
و اسلوبك حلو اوى و ضحكنى كلامك كتير
زى ما بنقول
هم يبكى و هم يضحك
Posted by: fancy | 12/21/2006
بجد مكال حلو اوي لكن انتي بتشتمي الريس ليه يا مجنونة
دا يكفي انو بيتكلم مصري مصري مش زي البائيين مش معروف أرعة الي
خلفوهم منين
احنا بنسمي الريس بتاعكم عندنا البقرة الضاحكة
هههههههههههه
على الاقل مصر بلد ديمقراطي حسب ما اعلم و الدليل الي احنا اعديين بنهببوا دلوقتي
للاسف في شعوب مش مسموحلها تتكلم او حتى ترفع دماغها
عجبني فيلم مصري طازة اوي
ظاظا رئيس جمهورية
فيلم يجنن
Posted by: ماجد | 01/31/2007
ههههههههههههههههههه
الله يخليكي لنا ضحكتيني ع المسا
بقالي يومين بحاول فيجر اوت ازاي اطلع من دور الاكتئاب
انت كنت من اسباب الخروج
سلام يا فوفا
Posted by: zenzana | 02/10/2007
ياست البنات انت للاسف امعه ماشيه مع الطيار
والله الانماط اللي زيكم همه اللي هيمكنوا الاخوان مننا ويخلونا مداس في رجليهم
ماله الريس؟
عايزاه يرمينا في جهنم الحمرا!!!؟
وياترى هترتاحي لما مصر تبقى زاي العراق مثلا
بطلوا سخافات بقى
بسرعة كده نسيتوا حسني مبارك وفضله علينا
؟؟؟؟!!!!
فعلا قلة اصل
وبكره تندموا وتقولوا ياريت اللي جرى ما كان
Posted by: usama amer | 02/27/2007
بتغرفوا اي عن برج السرطان
Posted by: سامر | 04/01/2007
بتعرفوا ايه عن برج السرطان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Posted by: سامر | 04/01/2007
ممكن مواصفات برج الجوزاء
Posted by: الجذابة | 04/12/2007
والله يا جماعه انتوا مش حاسين بالراجل ده أكيد في ضغوط أكبر مني ومنكم عليه بسبب ‘نه مش عايز ياخد القرارات اللي الشعب عايز ياخدهه ومتنسوش إنه مش ماسك البلد لواحده في رئيس وزره وغيره وعلى فكره انا برج ..............................الثور وده طبعا مش سبب للتعصب للبرج بتاعي لاكن مش عارف إنتوا عارفين ولا لا إن البرج ده يمتاز بالغمووووووووووووووووووووووض.
وأرجو لو انتي أو أي حد عايز يتناقش في موضوع الأبراج ده يكلمني لانه من إهتماماتي الشديده
وشكرا.
Posted by: Moustafa | 04/23/2007
ههههههههههههههههههه أنا من مواليد برج الثور ، وحاسس "يالفخر" لأنه سيادته واحد مننا
Posted by: ههههههههههههههههههه | 04/23/2007
بجد بوست هايل والاسلوب رائع وبصراحة دة شوية على مبارك فية اكتر بصه له هتلاقى فيه صفات اكترررررررررررررررررررررررررررررررررررر واكتررررررررررررررررررررررررررررررررررر ده ريسنا ويعيش الريس وعلا فكرة انا من محافظة الريس المنوفية اوعوا وسعوا لى اعملوا لى حساب اوعى الريس جاااااااااااااااااااااااااااااااى
هههههههههههههههههههههههههههههههههههههه
بس حقيقى بوست هايل هايل ورائع وجميل ومفيش كلمة تانى اقولها
انا برج الجوزاء عايز اعرف برجى وعايزة اعرف رجل التور وعلاقته بالجوزاء رجل التور هاا مش صفات الريس لا ده معلم له صفات خاصة بيه احنا عايزين صفات التور بتاعنا
اوكى سلام ياقشطة
Posted by: angham | 05/01/2007
ana mesh 3aref 22ol eh begad,bs 7ram keda elragel ma 3mlsh 7aga 3'lat da mzbtna y3ny ma ysthlsh menk keda ,we 2al eh ana da7'el a3mel search 3ala borg el 7'ara da 2la2y moubarak y7'y elahy ywl3 be gas bokra ymot we nestry7 ,bs brdo mesh hanstry7 2wy 3shan haysblna 7aga men re7to aho 3shan ama n3oz nftkro,allah y7r2o
Posted by: active | 05/14/2007
الريس برج التور وانا برج الحوووت يا ترى فيه توافق ولا ايه
هههههههههههههههههههههههههههههههههههههههه
Posted by: ماجد | 06/27/2007
انا بقوا ان ده كلام فاضي
Posted by: طلال | 08/27/2007
والله يعنى شفيييييييييييق ياراجل
والله ياراجل اه
شفيق ياراجل
لاء بجد انتى بتفكرى
Posted by: atef | 08/29/2007
انا تعليقى حلو وارجو بتاعى احلى
Posted by: atef | 08/29/2007
حقيقى بوست جامد
على فكره انا كمان برج الثور
بس مش هقولك انا هفخر بكونى مع الريس فى برج واحد
بالعكس
دا انا نفسى اغير برجى
اه بس لو اعرف
المهم
الريس مش مظلوم زى ما ناس بتقول
الريس غلطان فى حقنا كلنا
بس مش عشان سياسته
عشان مش بيبص على اللى تحته
سايب الرجاله اللى تحته يقوموا باحلى واجب معانا
وهو و لا هنا
بس ده امر واقع ومش فى ايدنا حاجه قصاده
غير اننا ندعى عليهم
او بقى نحاول نصلحهم وده معتقدش انه ممكن يحصل تحت اى ظروف
بس مشكلتنا فعلا اننا بنسكت
وبنسكت اوى
لغاية ما الفساد وصل لكل حاجه
عايزين ايه اكتر من ان الاوليمبياد المصرى للمعلوماتيه يتكوس
قبل ما يخلصوا تصفيات جوا مصر خدوا اتنين سفروهم يكملوا المسابقه العالميه
مع ان المفروض ان دى حاجه نبين فيها احترامنا ونطلع بجد مواهب مصر
لكن بدل ما نهتم بيها بنظلمها ونخليها تندم مليون مره انها فكرت تعمل حاجه لمصر
ليه
اكيد عشان ولاد واحد من الرجاله بتوعنا
اللى دايما واخدين حقهم
على حساب الشعب الغلبان
اللى كل حلمه انه بس يعيش عيشه محترمه
مش هنقول عربيه bmw ولا يعيش فى قصر
لا كل همه انه يبقى محترم
يحس انه فى بلده
يعيش فى بيت نضيف
وياكل اكله نضيفه
وميحسش انه غريب فى بلده
مع اننا فعلا فينا ناس كويسه
بس نرجع ونقول احنا اللى عملنا فى نفسنا كده
احنا اللى شعب مش بيمشى غير بالكرباج
ولو عاملته بالذوق
ابقى قابلنى لو عبرك
بس والله بقينا كده من اللى حصل لينا
شوفنا الذل طول عمرنا
يالله
مقدمناش غير الدعاء
يا رب ارحمنا وريحنا
سلام
Posted by: marwan | 09/18/2007
كل شي سخيف
Posted by: mimo | 11/28/2007
انا مشترك جديد برجي الثور احبك اكون واحد منكم اميلي موجود
Posted by: فهد | 04/15/2008
بجد الفكرة جامدة انك تكنبى العناوين وبعدين الصفات بس دى مش اى صفات هههههههههههه بس زعلت واللهى لان انا برج الثور يعنى مع الريس بس واللهى فية فرق كبيييرررررررررر بينى وبينة انا فين وهو فين هو الى احسن برضة هههههههههههههههههههههه
Posted by: Ayat | 05/12/2008
انا ايات من فلسطين وبرجي الثور/وتاريخ ميلادي هو 15/5/1989
Posted by: ايات | 05/15/2008